النهاية

قصيدة غنائية

• زين العابدين الضبيبي

روح عادي
لا تفكر راح اترجى وانادي
أو تحسِّب طيبتي تهزم عنادي
لاتطمَنْ صرت أعرف قدر نفسي
وصار لازم أحترم هيبة فؤادي

روح عادي
لا متى تهجر وتنسى
لا متى توجع وتقسى
لا متى تترك حياتي
عايمة من غير مرسى

روح عادي
في وجودك شاب في صدري الفرحْ
وفي بعادك وجه أيامي انشرحْ
كنت نور العين لو طال المسا
وصرت ذكرى لاطرَتْ بالي أنجرحْ

روح عادي
مانت لي آخر طموحي
أو منى قلبي وروحي
كنتْ مسودة عذابي
والبقية من جروحي

روح عادي
كنت في عمري حكاية من دموعْ
كنت جمرة هايمة بين الضلوعْ
كنت زفرة حزن تغتال الشموعْ
روح وانسى حتى تحلم بالرجوعْ

روح عادي
في البدايةْ
كان للأشواق ما بيني وبينك أمنياتْ
والمرايةْ
مثلنا تضحكْ وتحسدنا عيون الأغنياتْ
والروايةْ
عننا تحكي وتكتب عن هوانا ذكرياتْ
وفالنهايةْ
صابنا سهم السراب وضمنا قبر الشتاتْ

روح عادي
الحكاية
لانتْ تهواني ولا أنا مذهبكْ
ليش تتعبني وليش آنا أتعبك؟
في شباكك كان قلبي قد شبكْ
ليش للأوهام فكَيت الشبكْ
….