- عبدالملك الحاج
بعد ظهر ذلك اليوم كانت ” خلوة ذراع الابل ” تزدحم بعدد من الحضور الواصلين اليها من مناطق مختلفة وذلك للمشاركة في الاجتماع الذي دعا اليه المغبش لمناقشة امكانية انضمامهم الى جيش الثورة… كان الحاضرون لا يعرفون الامر الخطير والهام الذي دعاهم من اجله المغبش، انهم يتلهفون شوقا لسماع ما سيقول ….
المغبش:
دريتم لمو دعيتوكم اليوم.
الحوش:
لو كنا دارين والله ما اندينا خطوة لو يكن ما كان… لكن الشجن يخلي الواحد يحبي على ركبه… ذلحين قول لنا مو هو اللي برأسك ؟!
المغبش :
ابصرتم بعيونكم اليوم كم يا امم اقتشبت للراهده.
الاجرع :
انديتنا لا بيتك من سب تقول لنا هذن الخبارتين.
المغبش :
لا.. منشان نسير باكر محتشدين كلنا للجنه.
سعدان :
لمو نحتشد.. مو دخلنا نحشر نفوسنا بينهم.. هم يجمعوا القبائل من شان يسيروا يحاربوا الملكية عند اصحاب مطلع.. لا يدورونا ولا يشونا، يتحاربوا وينزلوا فحوس… لا نحن حق حرب ولا نقدر نعادي واحد منهم كلهم اسيادنا.
المغبش :
كيف مو دخلنا ؟! الا لنا دخل ونص وربع الثمن، الجمهورية هذي هي حقنا اكثر مما هي حقهم.
الحكب : انت عادك مشعب شعابه خيبه… منينه حقنا نحن الا مقارع طاسة… اغضب شيطانك يا مغبش لا تدهده لنا ولا تخلينا نقشش بالغصب وتدخلنا جحر الحمار.
المغبش :
اسمعوني سوى الفرصة ما تجي الا مخطر واحد وطاة مع ترجعش ثاني الا بعد دهر والدهر هذا يعلم الله ايحين شجي.. ذلحين الفرصة دجاهنا كم لنا ونحن ندور له، مو شوركم نقفي ونخليها تجزع علينا سكته مساكته ونجلس نتحسر بقية اعمارنا، والا نتحشفر للركب وكورنا جنابه نتزقر به ولا عا نفك له.
البغيل :
مو تشانا نعمل؟! قصدك نرجم بنفوسنا للوسط واللي شوقع وقع.
المغبش :
نبكر من غبش ربي نسجل معاهم باللجان عساكر ونرويهم اننا جمهوريين ازيد من الجمهوريه، والرجاله ماهيش مفصل على قياس ناس وناس لا، الرجاله ما تعرف الا وقت الزحوح والطحوح.
داغم :
تشتوا الصدق والا بن عمه.. ان جينا للصدق هم يتحاربوا بينهم البين ونحن علينا نجلس نشارح منو شغلب.. واللي شزوج امنا هو عمنا، اما تشانا نوقع قرامد وحطب للحرب لا مقلش ربي.
المغبش :
الجمهورية قامت من شان تساوي القبايل والاخدام والاحجور والدواشن والطواسج بالمشايخ والسادة… وانتم تشتو تجلسوا مثلما انتم… اتفطنوا وافهموا، بنيكم لابد ما يتنظفوا ويدخلوا المعلامات والمدارس يتعلموا ويطلعوا مثل بقية الاوادم تخاتره وضباط وطيارين ومسئولين، لو شفتم السود اصحابنا اللي بالحبشة والبلود الثانية.. يحكموها لاديس.. النسوان حقهم، اصغر وحده منهن مركب فوق عدنه ثلاثه طيور ونسر والباقي نجوم، وانتم مكانكم مغمضين ولا تشو تفتحوا.
الضوط :
انت بعقلك شخلوا بنينا يتعلموا مع بنيهم ويوقعوا مسئولين… اخرط لك اخرط.
المغبش :
لو عملنا لنا قيمة واحترمنا نفوسنا هم شحترمونا بالغصب… ما فيش حاجه تجي بالسهالة، لازم ما نشارك ونضحي منشان يقبلوا بنا والا كيف نقدر نفرض انفسنا ونعمل لنا بينهم هيبة واحنا اسفل السافلين.
هواش :
مو هي ذي الجمهورية مرة والا بقرة.. نشا نعرف اول موصله.
داغم :
منتش داري مو هي.. هذي مرة احمر عين، بطحت بالامام بطح وطلعت بداله فوق الكرسي تحكم.. بس هذك كانت اسمه ملكيه وهذي بسمه جمهورية اما الحكم واحدي ما فيش فرق بينهم.
المغبش :
لا مش اكة… الملكية الامام وابنه واخوته وبني عمه هم اللي يحكموا وحدهم حددهم، والجمهوريه اللي يحكم هو الرئيس والحكومة من الرعية مش هم سادة.
محمد حيدرة :
لو خلينا اصحابنا يبكروا الصبح الراهدة يكتتبوا عسكر تقولوا شقبلوهم والا شكردوهم.
المغبش :
شقبلوهم بالغصب والا لما عاد جمهرنا… اللجنه هي من المصريين والمصاريه ما يفرقوش بين السود والخضر والغبر والزرق الكل عندهم سوى.. المهم يمني سجل اسمك.
محمد حيدره :
خلونا نجرب يا عويله، اما به والا بجنبه، ونحن مو هو اللي شنخسره.. ان قبلونا كثر الله خيرهم، وان ردونا قي اجت منهم.
سعدان :
ان كان اللي يسجلوا المصارية نحن مقبولين وان كان اللجنة هم من دلقوه.. كل واحد شدسق عجره ونحن عجرنا ما شدسقش.
المغبش :
وانتم ما فيش معاكم لقوف ولا تسكوا تخبروا، انا لمو جمعتكم اليوم.. على شان نتوالي كيف باكر نظهر ظهرة تخليهم يعملوا لنا حساب، نهجل ونهتف نخلي كلهم يبصروا جنابنا وندخل لا قدام اللجنه.. يا وقبلونا من جيزهم والا وركضنا ابوها ركض وروحنا.. ذلحين ما فيش وقت لازم كل واحد يجزع مكان.. تبلغوا خبرتنا بكل النواحي يبكروا من الصباح الباكر ويتجمعوا بمدخل الراهدة من جناب تعز ومن جهة الشريجة وندخل دخله واحدي نهتف للجمهورية والثورة.. قدام قدام، لا تراجع ولا اهتزام.
سعدان :
على ايدك يا مغبش، انت كور ونحن بعدك ملعون من ترجع.
المغبش :
الان كل واحد يعرف اين شجزع لازم تنبهوا على اصحابنا وتسيروا لهم لكل قرية وتحرصوا عليهم يبكروا بالمرافع والطيسان والنسوان يعلعلين للجمهورية، باكر والله لانعمله تاريخ بداخلتك يالراهدة يسمعبه القاصي والداني ويجلسوا يتحاكوا به الصغار والكبار لا اخر من سبح…
جمهـوريـة بالتساوي
ثـورته عارمــة
لا عاد ذاك ابن حـره
او ذاك بن خادمه