- عبدالمجيد التركي
في يوم عيد الأم، بوس راس أمك، وبوس يدها، وبوس رجلها. وقول لها: الله يديمك يا اماه، ويحفظك، وكل عام وأنت بخير وبصحة وعافية.
لا تستحي من أمك لو جيت لعندها ويدك فاضية، لأنك مش قادر تشتري لها قارورة عطر، أو ثوب وطرحة، أو أي هدية لعيد الأم. هي عارفة أنك بدون مرتب من سبع سنين، وما بتنتظر منك شي، لأنها عارفة وضعك.. ويمكن لما تخرج من عندها تحط في جيبك مبلغ صغير كانت ناوية تشتري بهذا المبلغ علاج للسكر أو للضغط، وفضلتك على نفسها وعلى صحتها.
لو كنت بعيد عن أمك، وجيت مخصوص علشان تزورها في عيد الأم، بتفرح وبتقول لك: ما أشتي منك شي، زيارتك أكبر هدية.
أكبر هدية تقدمها لها انك توقف قدامها وتقول لها: كل عام وأنت بخير يا أغلى أم في الدنيا كلها.. وتحسسها بأمومتها، وبأن تعبها وسهرها ما راح بلاش، وتقول لها إن ما في شي بحياتك أغلى منها ولا من وجودها.
قل لها كل هذا الكلام، لا تستحي منها، ولا تتعامل معها برسمية، هي بحاجة تسمع الكلام اللي انت بتكتبه في الفيس بوك عنها وعن عيد الأم.
الأم بتتحمل دخان الحطب لأنك مش قادر تشتري دبة غاز..
الأم بتحمل الماء على رأسها لأنك مش قادر تشتري وايت ماء..
بتحمل كل همومك، (وزوجتك هي أم أيضاً)، وتتألم بصمت وما تظهر لك أنها مريضة، لأنها عارفة أنك مش قادر تاخذها للمستشفى، ومش قادر تشتري لها علاج. ولما تعرف أنها كانت مريضة تقول لها ليش ما تقولي إنك مريضة؟ بترد عليك وبتقول لك: (كنت عارفة أن مافيش معك فلوس وما حبيت أحمّلك فوق طاقتك)، وهذه العبارة يسمعها الكثير منا.
لا تسمح لزوجتك تتطاول على أمك بكلمة، ولا تفتح أذنك لكلامها وهي تقول لك: أمك قالت، أمك عملت، أمك ما بتحبك، أمك زعلانة لأنها بتشوفك مرتاح، أمك تحب أخوتك أكثر منك.
لا تصدق زوجتك لما تحرضك على الاستقلال في بيت لوحدك لأنكم مش واخذين راحتكم، وتترك أمك في بيت العائلة.. رغم أني مع الاستقلال، لكن إذا أمك رفضت فهذا يعني أنها مش قادرة على فراقك، ابقى عند أمك واستحمل دوشة وزحمة العائلة علشان خاطرها.
لما تتأخر اتصل بها وقل لها أنا بتأخر يا اماه، لما تسافر اتصل بها وقل لها أنا وصلت بالسلامة، لا تحسسها أنك كبرت وصرت رجَّال، خليها تقلق عليك علشان إحساسها بأمومتها يبقى مستمر.
كل عام وكل يوم وأمهاتنا الموجودات بخير، ورحم الله كل الأمهات الراحلات.
