لما السراب يشتي يقطِّر

يا ذاك بس، لا عتزيد الهدار
مابش معيا طافة اهدر
ضيعت وقتك عند من جا وسار
مكنت نفسك: هي عتسبر
مش سابرة، بس انت جالس حمار
بتبسر الباطل وتنكر
دلا على نفسك قطعت الزرار
ما عد عتلقى ما تزرِّر

اسم المجنّة عندنا: “السِّرَار”
ولا احداً فيها يسرِّر
وحبلها السري مثل القطار
من تحتها جالس يدوِّر
الميتين بيرقدوا في النهار
والليل كُلَّن قام يسمر
بيتجابروا عن فكرة الانتحار
وعن حريق اللي يِتَنْصِر
عن الرصاصة كيف تخزق جدار
عن الثكالى كيف تصبر
يا قابض الأرواح ليتك تُزار
أشتي أزورك، مسني الضر

الشيبة اللي كان مثل العِدَار
بيحرِّق الحلتيت والمُر
بيفعل مكاوي للبنات الصغار
ويهدر قليل… ويرجع يبخِّر
شوَّه صدور كانت شبيه النضار
واحرق حواجب، صدق، تِسحِر
بيلعب بأجساد الرعية قمار
الجهل بيخليه يقمِر
وزوجوه بالبنت هذك زِقار
وادوا لها زنة ومُشقر
هذِك بدل هذِك، بدون اعتبار
سوا سوا الدخن والبر
قبل البلوغ تخلع ثياب العِذار
وقبل ما تؤمن عتكفر
الأب يدعي: يا مقيل العثار
والأم تصيح: يا ساتر استر

للمه قلوب البعض مثل الحجار
ودائماً تقسى وتكسِر؟
وليش بعض الناس ماله مدار
يغِيْم في لحظة ويمطر؟
طبع الأوادم مثل طبع الغبار
أحيان يهيج، وأحيان يطعفر
هي هكذا الدنيا تعب وانتظار
تخرب، وزارة حين تسبر.

عاد المصايب والبلاوي الكبار
لما السراب يشتي يقطِّر
مش داري انه غير شوية بخار
الشمس عتخليه يفكِر
بيحلم بأنه مثل كل البحار
وان السفن فوقه بتبحر
لا به معه صورة، ولا به إطار
ولا معه بقعة يقمبر
نص الحقيقة عيب، والنص عار
والصدق هو دايم يعوِّر